रविवार हा आठवड्यातील सर्वांत प्रिय आणि उत्सुकतेने वाट पाहिला जाणारा दिवस आहे. सोमवार ते शनिवार या सहा दिवसांमध्ये प्रत्येकजण काम, अभ्यास, शाळा, नोकरी, व्यवसाय अशा दैनंदिन जबाबदाऱ्यांमध्ये इतका गुंतून जातो की शरीर व मन थकून जाते. या थकव्याला आराम देण्यासाठी, नवी ऊर्जा मिळवण्यासाठी रविवारची सुट्टी ही जणू ईश्वराने दिलेली अनमोल भेटच आहे.
सुट्टी म्हणजे केवळ विश्रांती नव्हे तर स्वतःसाठी, आपल्या कुटुंबासाठी, छंदांसाठी वेळ मिळणे. रविवारच्या सकाळी एखाद्याला थोडा उशिरा उठणे आवडते तर काहीजण लवकर उठून फिरायला, व्यायामाला जातात. शाळकरी मुलांसाठी रविवार हा गृहपाठ पूर्ण करण्याचा, खेळण्याचा, टी.व्ही. बघण्याचा आणि मित्रांबरोबर वेळ घालवण्याचा दिवस असतो. कामकाजी व्यक्तींना घरातील कामे, अपूर्ण राहिलेल्या गोष्टी पूर्ण करण्याची, खरेदी करण्याची आणि कुटुंबीयांसोबत गप्पा मारण्याची संधी रविवारच्या सुट्टीत मिळते.
रविवार हा दिवस कुटुंबीयांमध्ये आपुलकीचे बंध घट्ट करणारा असतो. आठवड्याभरात सर्वजण व्यग्र असल्याने एकत्र बसून जेवण, फिरणे किंवा एखादा सिनेमा पाहणे रविवारच्या दिवशीच शक्य होते. त्यामुळे हा दिवस केवळ शारीरिक विश्रांतीचाच नव्हे तर मानसिक आनंदाचाही ठरतो.
शिक्षक, डॉक्टर, शेतकरी किंवा अन्य क्षेत्रातील लोकांनाही या दिवशी आपल्या आवडीचे कार्य करण्याची मोकळीक मिळते. कुणी वाचनात वेळ घालवतो, कुणी लेखन करतो, कुणी छायाचित्रण, संगीत किंवा चित्रकलेसारख्या छंदात रमतो. काहींसाठी रविवार हा धार्मिक व आध्यात्मिक कार्याचा दिवस असतो. मंदिरे, पूजा, भजन, प्रवचन यांत सहभागी होऊन आत्मिक शांती मिळवली जाते.
रविवारचा उपयोग जर केवळ आळशीपणासाठी केला, तर त्याचे महत्त्व कमी होते. पण ज्याने रविवारला योग्य पद्धतीने वापरले, त्याला पुढील आठवड्यात नवी ऊर्जा व प्रेरणा मिळते. सुट्टी म्हणजे एक प्रकारचा पुनर्जन्मच. त्यामुळे हा दिवस नियोजनपूर्वक साजरा केला, तर आठवड्याचे बाकी दिवस अधिक आनंददायी व कार्यक्षम होतात.
अखेरीस, रविवारची सुट्टी ही प्रत्येकासाठी नव्या उमेद, ताजेपणा, कुटुंबीयांचे सहकार्य आणि जीवनातील संतुलन टिकवून ठेवणारा सुवर्णक्षण असतो. त्यामुळे “सुट्टीचा दिवस – रविवार” हा प्रत्येकाच्या आयुष्यात न विसरता येणारा आणि आनंद देणारा दिवस ठरतो.
✍️ *श्री. संजय एन. लेनगुरे (उमाशी) न. प. नेहरु विद्यालय व कनिष्ठ महाविद्यालय, तुमसर.जिल्हा – भंडारा*
