भाजपचे ‘संकटमोचक’ गिरीश महाजन स्वत:च्याच जिल्ह्यात संकटात

✒️जयदीप लौखे-मराठे,वेल्हाणे(धुळे प्रतिनिधी)

जळगाव(दि.16मार्च):- जळगाव महापालिकेच्या महापौर व उपमहापौर निवडीच्या अवघ्या तीन दिवस अगोदरच सत्ताधारी भाजपाचे ५७ पैकी २५ नगरसेवक शिवसेनेकडून सहलीवर गेल्याने भाजपचे संकटमोचक गिरीष महाजन स्वत:च्याच जिल्ह्यात संकटात सापडले आहेत. भाजपाचे विद्यमान महापौर सुनिल खडके, माजी महापौर ललित कोल्हे यांच्यासह या २५ नगरसेवकांनी भाजपाला सोडचिठ्ठी देत शिवबंधनात अडकण्याची तयारी केली आहे. यामुळे आता जळगाव महापालिकेत शिवसेनेच्या जयश्री महाजन या महापौर होण्याची शक्यता निर्माण झाली आहे.

दरम्यान भाजपाने महापौरप निवडणुकीसाठी व्हीप जारी केला असून उर्वरित नगरसेवकांना महाजन यांनी अज्ञातस्थळी हलविले आहे. शिवसेनेकडून सहलीवर गेलेले भाजप नगरसेवक मुंबईत असून राज्यातील नऊ नगरसेवकांनी शिवसेनेत नुकताच प्रवेश केल्याचे खात्रीलायक वृत्त आहे.जळगाव महापालिकेची महापौर व उपमहापौर पदाची निवडणूक १८ मार्च रोजी जाहीर झाली आहे. या निवडणुकीपूर्वीच राजकीय वर्तुळ ढवळून निघाले आहे. रविवारी दुपारनंतर महापालिकेच्या राजकीय वर्तुळात जोरदार आणि धक्कादायक घडामोडी घडल्या. महापौर व उपमहापौर पदाचा उमेदवार निश्चित करण्यासाठी बैठक घेण्यापूर्वीच सत्ताधारी भाजपचे तब्बल २५ नगरसेवक ‘नॉट रिचेबल’ झाल्याने खळबळ उडाली होती. हे सर्व नगरसेवक शिवसेनेच्या गोटात जाऊन सामील झाल्याने भाजपचे संकटमोचक माजीमंत्री गिरीश महाजन चांगलेच अडचणीत आले आहेत. भाजप सेनेच्या नेत्यांचे वेगवेगळे दावे.

शिवसेनेचे उपनेते तथा पालकमंत्री गुलाबराव पाटील यांनी भाजपचे २५ पेक्षा जास्त नगरसेवक गायब झाल्याची माहीती दिली होती. तर भाजप नेते व माजी मंत्री गिरीश महाजन यांनी भाजपचे १७ नगरसेवक नाट रिचेबल असल्याचे मान्य केले. राष्ट्रवादीचे नेते व माजी मंत्री एकनाथ खडसे यांनी भाजपचे २५ नगरसेवक फुटल्याचे सांगितले. एमआयएमचे नगरसेवक देखील सेनेसोबत आल्याचा दावाही त्यांनी केला आहे.

सांगली पॅटर्न शिवसेनेकडून जळगावात

भाजपच्या फुटलेल्या नगरसेवकांकडून या बंडाचे कारण आमदार सुरेश भोळे यांच्या विरोधात असलेली नाराजी असल्याचे सांगितले आहे. सांगली महापालिकेत ज्या प्रमाणे भाजपचे स्पष्ट बहूमत असतानाही महापौरपद राष्ट्रवादीने मिळविले. तोच पॅटर्न जळगाव महापालिकेत शिवसेना नेतृत्वाकडून राबविण्यात आला आहे. यासाठी थेट मुख्यमंत्री उध्दव ठाकरे यांनीही हिरवी झेंडी दिल्यानतंरच पालकमंत्री गुलाबराव पाटील याच्या मार्गदर्शनाखाली स्थानिक शिवसेनेच्या पदाधिकाऱ्यांनी ही खेळी पूर्णत्वास नेली.

भाजप नेत्यांकडून अपात्रतेच्या कारवाईचा इशारा

भाजपचे जे नगरसेवक फुटले आहेत. त्या नगरसेवकांवर अपात्रतेची कारवाई करण्याचा इशारा भाजप नेते गिरीश महाजन यांनी दिला आहे. महापौरपदाच्या निवडणुकीसाठी भाजपकडून व्हीप बजाविण्यात आला आहे. फुटीसाठी २/३ बहूमत आवश्यक असते. ५७ नगरसेवकांमधून ३८ नगरसेवक बाहेर पडले तरच या नगरसेवकांची अपात्रतेची कारवाई टाळता येईल.शिवसेनेकडून महापौरपदासाठी जयश्री महाजन ज्यांचे नाव समोर आले आहे.

भाजपचे नगरसेवक शिवसेनेच्या गोटात सहभागी होताच काल रात्री शिवसेनेच्या नगरसेवकांची लढ्ढा फार्म येथे बैठक झाली. या बैठकीत शिवसेनेच्या सर्व नगरसेवकांना व्हीप बजविण्यात आला . शिवसेनेकडून महापौरपदासाठी जयश्री महाजन यांना उमेदवार म्हणून देखील निश्चित केले आहे.

महापालिकेतील पक्षीय बलाबल:-

भाजप- ५७
शिवसेना-१५
एमआयएम-३
एकूण- ७५