✒️सुयोग सुरेश डांगे(विशेष प्रतिनिधी)
चिमूर(दि.2जुलै):-“परिस स्पर्श योजना” हा महाराष्ट्र सरकारने राज्यातील उच्च शिक्षणाची गुणवत्ता वाढविण्यासाठी सुरू केलेला एक मार्गदर्शन कार्यक्रम आहे. मूल्यांकन आणि मान्यता प्रक्रिया समजून घेण्यासाठी अद्याप NAAC/NBA मान्यताप्राप्त नसलेल्या महाविद्यालयांना मार्गदर्शन आणि मदत करणे हे या उपक्रमाचे उद्दिष्ट आहे. मान्यताप्राप्त महाविद्यालयांच्या (मेंटर) कौशल्याचा वापर करून NAAC मूल्यांकन प्रक्रिया पूर्ण न केलेल्या महाविद्यालयांना (मेंटी) त्यांची गुणवत्ता सुधारण्यास आणि मान्यता मिळविण्यास मदत करते.
या योजनेच्या यशस्वी अंमलबजावणीसाठी, गोंडवाना विद्यापीठने, ग्रामगीता महाविद्यालय, चिमूर ला NAAC मूल्यांकन प्रक्रिया पूर्ण न केलेले पदवीधर संस्थांना मार्गदर्शन करण्यासाठी आणि मदत करण्यासाठी मार्गदर्शक (मेंटर) संस्था म्हणून निवडले आहे. मार्गदर्शन घेणारे (मेंटी) संस्थांमध्ये कला आणि वाणिज्य महाविद्यालय, भिसी, वाय. एस. पवार महाविद्यालय, नेरी आणि स्व. दागोजी पिसे महाविद्यालय, नेरी यांच्या समावेश आहे.
ग्रामगीता महाविद्यालय या मार्गदर्शन घेणाऱ्या (मेंटी) संस्थांना NAAC मूल्यांकन प्रक्रिया पूर्ण करण्याकरिता सहयोग आणि ज्ञान सामायिकरण आणि संस्थात्मक विकास इत्यादीं द्वारे त्यांची गुणवत्ता सुधारण्यास मदत करेल. या कार्यक्रमाद्वारे, मेंटी संस्थांना NAAC आणि NBA मान्यता बद्दल मार्गदर्शन, राष्ट्रीय शिक्षण धोरण (NEP) 2020 च्या अंमलबजावणीमध्ये समर्थन, संबंधित प्रक्रिया आणि दस्तऐवजीकरणावर प्राध्यापक आणि कर्मचाऱ्यांना प्रशिक्षण, संशोधन सहकार्य आणि प्राध्यापक विकासाच्या संधी, सर्वोत्तम पद्धतींचा अवलंब इ. गोष्टींचा फायदा होईल. तसेच
मार्गदर्शक (मेंटर) संस्थेला इतर संस्थांसोबत वाढीव सहकार्याच्या संधी, इतर संस्थांना सुधारण्यास मदत केल्याबद्दल समाधान आणि NIRF क्रमवारी आणि NAAC मान्यतामध्ये संभाव्य मदत या गोष्टींच्या फायदा होईल.
या कार्यक्रमांतर्गत, नियमित अंतराने बैठका आणि कार्यशाळा आयोजित केल्या जातील. तसेच, मार्गदर्शक संस्थेच्या विविध क्रायटेरिया प्रमुख आणि मार्गदर्शक संस्थांच्या क्रायटेरिया प्रमुखांमध्ये वैयक्तिक बैठका आणि चर्चा आयोजित केल्या जातील.
ग्रामगीता महाविद्यालय चिमूर येथे दिनांक १ ऑगस्ट २०२५ रोजी, परिस स्पर्श योजनेचा अंमलबजावणी करिता मेंटी संस्थांसाठी *’NAAC च्या पद्धती आणि प्रक्रिया समजून घेण्यासाठी कार्यशाळा/प्रशिक्षण कार्यक्रम’* आयोजित केला होता. या कार्यक्रमाचे अध्यक्षपद ग्रामगीता महाविद्यालय, चिमूरच्या प्राचार्या डॉ. सुनंदा अस्वले यांनी भूषवले, तर डॉ. अपर्णा धोटे, IQAC समन्वयक, एन. एस. कॉलेज भद्रावती आणि डॉ. निलेश ठवकर, IQAC समन्वयक, ग्रामगीता महाविद्यालय चिमूर हे या कार्यशाळेचे संसाधन व्यक्ती म्हणून उपस्थित होते. तसेच, मेंटी संस्थेचे क्रायटेरिया क्रमांक १ ते ७ चे प्रमुख, डॉ. वरद खटी, श्री. नागेश ढोरे, श्री. विवेक माणिक, श्री. संदीप मेश्राम, डॉ. मृणाल वऱ्हाडे, डॉ. बिजनकुमार शील आणि डॉ. युवराज बोधे हे मेंटी संस्थांच्या क्रायटेरिया प्रमुखांशी संबंधित निकषांवर चर्चा करण्यासाठी उपस्थित होते.
रिसोर्स पर्सन, डॉ. अपर्णा धोटे यांनी NAAC मान्यतामध्ये समाविष्ट असलेल्या विविध पद्धती आणि प्रक्रियांबद्दल चर्चा आणि मार्गदर्शन केले. त्यांनी या प्रक्रियेदरम्यान येणाऱ्या विविध अडथळ्यांबद्दल आणि त्यांचे संभाव्य उपाय देखील स्पष्ट केले. कार्यक्रमाचे दुसरे रिसोर्स पर्सन डॉ. निलेश ठवकर यांनी IIQA आणि SSR बद्दल मेंटी संस्थांचे मार्गदर्शन केले.अध्यक्षीय भाषणात डॉ. सुनंदा आस्वले यांनी सुद्धा मेंटी संस्थेला मार्गदर्शन केले आणि त्यांच्या NAAC मान्यता होईपर्यंत सहकार्य करण्याचे आश्वासन दिले.
प्रशिक्षण कार्यक्रमादरम्यान ग्रामगीता महाविद्यालयाचे आणि मेंटी संस्थांचे प्राचार्य, IQAC समन्वयक तसेच सर्व क्रायटेरिया प्रमुख उपस्थित होते.
