चंद्रपूर – चंद्रपूर वन प्रशासन विकास व व्यवस्थापन प्रबोधिनी, चंद्रपूर येथे दिनांक ११ ते १३ ऑगस्ट २०२५ दरम्यान हवामान बदल व पर्यावरण संरक्षण या विषयावर इको क्लब शिक्षकांचे तीन दिवसीय प्रशिक्षण शिबिर यशस्वीरित्या संपन्न झाले. भंडारा जिल्ह्यातील ५१ शिक्षकांनी या प्रशिक्षणात सक्रिय सहभाग नोंदवला. हवामान बदल व त्याचे दुष्परीणाम याविषयी शिक्षकांमध्ये जागरुकता निर्माण व्हावी आणी या गंभीर समस्येवर शिक्षण आणी विद्यार्थ्यांमध्ये सुसंवाद निर्माण होण्याच्या दृष्टीकोनातून वनप्रबोधिनी चंद्रपूरचे संचालक श्रीनिवास रेड्डी यांच्या मार्गदर्शनाखाली या प्रशिक्षणाचे आयोजन करण्यात आले.
प्रशिक्षणाचे उद्घाटन उमेश वर्मा, अपर संचालक (प्रशिक्षण), श्री. एस. एस. दहीवले, सत्र संचालक श्री. एस. के. गवळी, सत्र संचालक आणी श्री. खुशाल रामगीरकर, सत्र संचालक यांच्या प्रमुख उपस्थितीत झाले.
उद्घाटन प्रसंगी मान्यवरांनी शालेय स्तरावर पर्यावरण शिक्षणाचा प्रसार करण्याचे महत्व पटवून दिले व शिक्षकांनी समाजात पर्यावरणाबाबत जागृती निर्माण करण्याची गरज व्यक्त केली.
या तीन दिवसांच्या प्रशिक्षणात खालील मुद्यांवर सविस्तर चर्चा झाली. हवामान बदल कारणे व परिणाम त्यावरील प्रतिबंध व उपाय योजना (Mitigation Strategies), वन्यजीव व जैवविविधतेचे रक्षण जंगलतोड व तिचे दुष्परिणाम, प्रदूषण, वनजमिनीवरील अतिक्रमण व मानव-वन्यजीव संघर्ष इत्यादी विषयांवर अनुभवी व्याख्यात्यांकडुन प्रशिक्षणार्थ्यांना मार्गदर्शन करण्यात आले.
या प्रशिक्षणाचा भाग म्हणून श्रद्धेय अटल बिहारी वाजपेयी बोटॅनिकल गार्डन, विसापूर आणि ताडोबा अंधारी व्याघ्र प्रकल्प येथे क्षेत्रभेटीचे आयोजन करण्यात आले. या भेटीदरम्यान शिक्षकांना प्रत्यक्ष संरक्षण उपाययोजना, वन्यजीवांचे निरीक्षण व जैवविविधतेचे महत्व समजावून घेण्याची संधी मिळाली.
या प्रशिक्षणाचा उद्देश शिक्षकांना पर्यावरणीय प्रश्नांबाबत सुसज्ज करणे व विद्यार्थ्यांमध्ये पर्यावरण संरक्षणाची जाणीव निर्माण करणे हा होता. सर्व सहभागी शिक्षकांनी त्यांच्या शाळा व समाजात पर्यावरण रक्षणाचा संदेश पोहोचवण्याचा निर्धार व्यक्त केला.
