तब्बल २४०० कोटींवर डल्ला!

✒️नागपुर(पुरोगामी संदेश नेटवर्क)

नागपूर(दि.23जुलै):-सर्वसामान्य कर्जदारांना बँकेकडून कर्ज मिळवताना अनेक बाबींची पूर्तता करावी लागते. इतकेच नव्हे कर्जाचा एखादा हफ्ता चुकला तरी बँकांकडून तो भरण्यासाठी तगादा लावण्यात येतो किंवा संबंधिताला थकबाकीदार ठरवून कारवाई सुद्धा करण्यात येते. दुसरीकडे, याच बँकांकडून हजारो कोटींचे कर्ज घेतल्यानंतर ती भरण्यास असमर्थता दाखवणाऱ्या मोठ्या कर्जदारांना मात्र जणू ‘सूट’ मिळत असल्याचे पुढे आले आहे. देशभरातील अशाच काही कर्ज थकवणाऱ्यांच्या यादीत नागपूरच्याही काही बड्या व्यावसायिकांचा समावेश आहे. या व्यावसायिकांकडून अलीकडच्या काळात राष्ट्रीयीकृत बँकांकडून घेतलेली सुमारे अडीच हजार कोटींची कर्ज थकवण्यात आली असल्याचे पुढे आले आहे.

ऑल इंडिया बँक एम्प्लॉईज असोसिएशन (एआयईबीए) या बँक कर्मचाऱ्यांच्या राष्ट्रीयीकृत संघटनेने बँकांच्या राष्ट्रीयीकरण दिनानिमित्त मोठ्या प्रमाणात कर्ज थकवणाऱ्या ‘विलफुल डिफॉल्टर्स’ची यादी नुकतीच तयार केली. यात किंगफिशर एअरलाइन्स, गीतांजली जेम्स, विनसम डायमंड्स या काही बड्या समूहांसह नागपुरातील पद्मेश गुप्ता यांच्या गुप्ता समूह, अभिजित समूह, टॉपवर्थ ग्रुप, रसोया प्रोटिन्स यांचा समावेश आहे. विशेष म्हणजे, गुप्ता समूहानेच राष्ट्रीयीकृत बँकांचे सर्वाधिक असे १,८०० कोटी रुपयांचे कर्ज थकवले आहे. एआयबीईएच्यावतीने देशभरातील कर्ज थकवणाऱ्यांची यादी तयार करण्यात आली. ती ५ कोटी, २०० कोटी आणि ५०० कोटी अशा श्रेणीत करण्यात आली आहे. विशेष म्हणजे, या यादीत कोणत्या बँकेकडून किती कर्ज घेण्यात आले आहे, त्याची माहितीही देण्यात आली आहे.
दरम्यान, नागपुरातील कोणत्या समूहाने कशापद्धतीने कर्ज थकवले आहे, याची माहिती संबंधित प्रकरणांचा अभ्यास केल्यानंतरच अधिक सविस्तरपणे सांगता येईल, असेही एआयबीईएच्या सूत्रांनी स्पष्ट केले.

नागपुरातील ‘डिफॉल्टर्स’ असे…

राष्ट्रीयीकृत बँकांचे सर्वाधिक कर्ज थकवणाऱ्यांमध्ये पद्मेश गुप्ता यांच्या गुप्ता कोल प्रायव्हेट लिमिटेडचा समावेश आहे. या समूहाने बँक ऑफ इंडियाकडून ७०४ कोटींचे, तर पंजाब नॅशनल बँकेकडून ३१९ कोटींचे कर्ज घेतले होते. ते अजूनही परत केलेले नाही. तर व्यावसायिक मनोज जयस्वाल यांच्या अभिजित समूहाच्या जस इन्फ्रा अॅन्ड पॉवर लिमिटेड कंपनीचाही यात समावेश आहे. या समूहातील कंपन्यांकडे किमान १० हजार कोटींची देणी थकीत असल्याची माहिती आहे. जस इन्फ्रा कंपनीचा वीजप्रकल्प बिहारमधील बांका जिल्ह्यात आहे. यासाठी कंपनीने पंजाब नॅशनल बँक आणि युको बँकेकडून जवळपास ६३० कोटींचे कर्ज घेतले होते. अभिजित समूहाची आणखी एक कंपनी कॉर्पोरेट पॉवर लिमिटेडने अलाहाबाद बँकेकडून २०० कोटींचे कर्ज घेतले होते. तेसुद्धा अजून परत केलेले नाहीत. त्याचप्रमाणे या यादीत वरॉन अॅल्युमिनियमचा समावेश आहे. या समूहाने २९२ कोटींचे कर्ज घेतल्याची माहिती असून नागपुरात समूहाचा वरॉन ऑटोकास्ट नावाचा प्रकल्प आहे. याशिवाय यात २० ते १५० कोटींपर्यंतचे कर्ज थकवणाऱ्या इतर लहान मोठ्या समूहांचाही समावेश आहे.

कायदेशीर कारवाई व्हावी या सर्व थकबाकीदारांविरुद्ध कायदेशीर प्रक्रियेद्वारे कारवाई व्हावी. आवश्यकता असेल तर यासाठी विशेष कायदाही करण्यात यावा, अशी मागणी एआयबीईएचे महासचिव टी.एस. व्यंकटचलम यांनी केली आहे.